Vokazzjoni Franġiskana

Qabel ma għamilt l-għazla tiegħi u għidt iva, għaddejt minn proċess ta’ dixxerniment biex naċċerta ruħi mis-sejħa reliġjuza tiegħi. Kien u għadu jikkumpanjani id-direttur spiritwali tiegħi Fr Marcellino Micallef OFM. Għaldaqstant, jiena bdejt din is-sena ta’ Postulant.

Bħalissa qed ngħix ġewwa l-kunvent tagħna fir-Rabat, Malta. Propju illum 29 ta’ Marzu 2011, għalaqt sitt xhur min mindu bdejt il-mixja Franġiskana. Il-ħajja fil-kunvent tinkonsisti li ngħix il-ħajja ta’ fraternita’ ma ħuti l-patrijiet, filwaqt li nibqa jmmur ix-xogħol, nistudja u fuq kollox nitlob biex ikolli l-enerġija spiritwali u qaddisa. Bħalma l-Immakulata Kunċizzjoni, il-Verġni Marija, aċċettat is-sejħa mingħand il-Mulej, huwa għalhekk li nitlobha għal għajnuna fil-mumenti diffiċli tiegħi li ngħaddi minnhom matul il-mixja tiegħi.

Fil-bidu ta’ Lulju, ta’ din is-sena 2011, nerġa’ nirritorna d-dar għal xahrejn biex inkompli naċċerta ruħi minn din l-għazla li għamilt. Intemm l-impjieġ tiegħi, sabiex ikolli iktar ħin ta’ talb u riflessjoni w’nqatta’ iktar ħin mal-familja tiegħi u l-ħbieb.

Jekk Alla jrid, għall-ewwel ġimgħa ta’ Settembru ta’ din is-sena, nagħti bidu ghan-novizzjat tiegħi. Waqt il-koncellebrazzjoni ewkaristika issir il-vestizzjoni u ningħata it-tonka (il-libsa franġiskana). L-għada tal-vestizzjoni immur Assisi ġewwa l-Italja għal perjodu ta’ sena, fejn ninqata’ propju minn kollox. In-novizzjat jikkonsisti li ngħix hajja ta’ fraternita ma’ sħabi novizzi Taljani godda. Talb profond. Nistudja l-ħajja ta’ San Frangisk u r-reġola tal-Ordni tagħna.

Qabel nagħlaq din il-kitba, nixtieq ngħaddi dan il-messaġġ: Il-veru ferħ u paċi jinsabu għand Gesu Kristu, u mhux fl-affarijiet tad-dinja. Duqu u taraw kemm hu tajjeb il-Mulej! La tibzgħux terqsu lejH, Gesù kollu ħniena u tjubija!

Nitlobkom titolbu għalija u nwegħidkom it-talb tiegħi.